देश संघीय व्यवस्थामा गएपछिको दोस्रो पटकको स्थानीय तहको निर्वाचन आगामी बैशाख ३० गते हुने भए सँगै यतिबेला स्थानीय तहको निर्वाचन लड्नका लागि आकांक्षीहरू राजनीति भेटघाटमा ब्यस्त हुन थालेका छन् ।
एकातिर राजनैतिक दलहरू गाउँ गाउँमा संगठन एवं चुनावी वातावरण निर्माणका लागि दौडधुपमा छन् भने अर्कोतिर नगर तथा गाउँपालिकामा उम्मेदवार बन्नकोलागि उपल्लो तहका नेताहरू सँग लभिङमा व्यस्त छन् ।
बागलुङ जिल्लामा रहेका दश स्थानीय तहहरू मध्यको वडिगाड गाउँपालिकाको प्रमुखमा नेपाली काङ्ग्रेसबाट उम्मेदवार बन्नकालागि ६ जना आकांक्षी देखिएका छन् ।
बैशाख ३० गतेका लागि घोषणा गरिएको स्थानीय तहको निर्वाचनमा गाउँपालिका प्रमुखमा नेपाली काङ्ग्रेस बागलुङका सचिव गण्डकी थापा अधिकारीले आफु सशक्त उम्मेदवार रहेको हिडन खबर सँगको कुराकानीमा बताउनुभयो ।
त्यस्तै उम्मेदवारका आकांक्षीमा गाउँपालिकाका उप प्रमुख अम्मर बहादुर श्रीष र वडा नम्बर ५ का वडा अध्यक्ष अर्जुन प्रसाद खरेल, वडा नम्बर-७ का वडा अध्यक्ष कृष्ण गुरुङ, पूर्व महाधिवेशन प्रतिनिधि कृष्ण केसी र नेपाली काङ्ग्रेस वडिगाड गाउँपालिकाका प्रमुख सल्लाहकार हरिलाल खरेलले हिडन खबर राजनैतिक व्युरो सँगको फोन संवादमा उम्मेदवार बन्ने दावी गरेका छन् ।
पहिलो पटकको स्थानीय निर्वाचनमा गाउँपालिका प्रमुखमा तत्कालीन नेकपा सँग ५ सय २२ मतान्तरले पराजित भएको काङ्ग्रेस यसपटक भने आफ्नो पक्षमा नेतृत्व हातपार्ने योजनामा रहेको एक नेताको दावी छ ।
