बागलुङ । नेपाली मौलिक कला, संस्कृति र परम्पराको संरक्षण तथा खेलकुद क्षेत्रको विकास गर्ने उद्देश्यले जैमिनी भलिबल संघले तिहारको अवसरमा देउसी–भैलो कार्यक्रम आयोजना गर्ने भएको छ।
‘खेलकुदको विकास, संस्कृतिको संरक्षण हाम्रो अभियान’ भन्ने मूल नारासहित आयोजना हुन लागेको कार्यक्रममार्फत मौलिक संस्कृति संरक्षणसँगै खेलकुद गतिविधिलाई प्रोत्साहन गर्ने लक्ष्य राखिएको संघले जनाएको छ।
नेपाली समाजको मौलिक सांस्कृतिक परम्पराका रूपमा रहेको देउसी–भैलोले आपसी सद्भाव, भाइचारा र सामाजिक एकता कायम गर्न महत्वपूर्ण भूमिका खेल्दै आएको छ। पछिल्लो समय आधुनिक जीवनशैलीका कारण मौलिक कला र संस्कृति ओझेलमा पर्दै गइरहेको अवस्थामा नयाँ पुस्तालाई परम्परासँग जोड्ने उद्देश्यले कार्यक्रम आयोजना गर्न लागिएको हो।
जैमिनी भलिबल संघले खेलाडीको क्षमता अभिवृद्धि तथा खेलकुद क्षेत्रको विकासका लागि विभिन्न गतिविधि सञ्चालन गर्दै आएको छ। देउसी–भैलोबाट संकलित सहयोग रकम संस्थाको उद्देश्यअनुसार खेलकुद विकास, खेलाडी प्रोत्साहन तथा संस्थागत गतिविधिमा उपयोग गर्ने अपेक्षा गरिएको छ।
कार्यक्रममा स्थानीय कलाकार, युवायुवती तथा सांस्कृतिक समूहको सहभागिता रहने अपेक्षा गरिएको छ। यसले स्थानीय कला, प्रतिभा र मौलिक संस्कृतिको प्रवर्द्धनमा समेत सहयोग पुग्ने विश्वास गरिएको छ।
संस्कृति संरक्षण र खेलकुद विकासलाई एउटै अभियानमा जोड्ने उद्देश्यसहित संघले आयोजना गर्न लागेको देउसी–भैलो कार्यक्रमले सामाजिक एकता र स्थानीय खेलकुद क्षेत्रको विकासमा योगदान पुर्याउने अपेक्षा गरिएको छ।
