काठमाडौं । नेपाली लोक तथा दोहोरी गीत क्षेत्रमा स्थापित नाम हुन् सम्झना भण्डारी। मिठासपूर्ण स्वर, दोहोरी गायनको क्षमता र निरन्तर सांगीतिक यात्राले उनलाई पछिल्लो पुस्ताकी चर्चित लोकदोहोरी गायिकाका रूपमा स्थापित गरेको छ।
लमजुङमा जन्मिएकी भण्डारीले काठमाडौंका दोहोरी साँझबाट आफ्नो सांगीतिक यात्रा सुरु गरेकी हुन्। पुतलीसडकस्थित बागलुङ कालिका दोहोरी साँझबाट व्यावसायिक गायन थालेकी उनले कुलेन्द्र विक, राजन ठकुरी, शिव हमाल र स्वर्गीय मञ्जु महतसँग सहकार्य गर्दै अनुभव बटुलेकी थिइन्। त्यसपछि गाउँबेँसी दोहोरी साँझमा पनि उनले गायनलाई निरन्तरता दिइन्।
राति दोहोरी साँझमा गीत गाउने र बिहान संगीत सिक्ने संघर्षपूर्ण यात्राले उनको गायनलाई थप निखार दियो। मनोजराज शिवाकोटीसँग संगीत अध्ययन गरेकी भण्डारीले पछि चन्दन श्रेष्ठसँग पनि संगीतसम्बन्धी ज्ञान हासिल गरेकी थिइन्।
उनको प्रारम्भिक चर्चित गीत ‘तोरी भएछ’ ले सांगीतिक यात्रालाई नयाँ मोड दियो। त्यसपछि तीज, दशैं–तिहार तथा विभिन्न लोकदोहोरी गीतमार्फत उनी श्रोता–दर्शकमाझ लोकप्रिय बन्दै गइन्। पशुपति शर्मासँगको सहकार्यले पनि उनको परिचय अझ फराकिलो बनायो।
‘छिन छिन बज्ने चुरा’ गीतबाट उनले विशेष चर्चा कमाइन्। यही गीतका लागि उनले इमेज अवार्डमा सर्वोत्कृष्ट लोकदोहोरी गीतको अवार्ड प्राप्त गरेकी थिइन् भने विभिन्न राष्ट्रिय अवार्डमा मनोनयनसमेत परेकी थिइन्।
गायनसँगै संस्थागत गतिविधिमा सक्रिय भण्डारी अहिले राष्ट्रिय लोक तथा दोहोरीगीत प्रतिष्ठान नेपालको नेतृत्व तहमा पुग्ने तयारीमा छिन्। प्रतिष्ठानको २५औँ महाधिवेशनमा उनले खुलातर्फ सह–कोषाध्यक्ष पदमा उम्मेदवारी घोषणा गरेकी छन्।
दोहोरी साँझको संघर्षपूर्ण यात्रादेखि अवार्ड विजेता गायिका र अहिले संस्थागत नेतृत्वको आकांक्षीसम्मको यात्रा सम्झना भण्डारीलाई नेपाली लोकदोहोरी क्षेत्रको प्रेरणादायी व्यक्तित्वका रूपमा स्थापित गरेको छ।
