काठमाडौं, भदौ ६ – नेपाली गीत–संगीत तथा कला क्षेत्रका स्रष्टा, कलाकार र संगीतकर्मीहरूको सम्मान तथा प्रोत्साहन गर्ने उद्देश्यले आयोजना हुँदै आएको चौथो नेसनल ब्राण्ड म्युजिक अवार्ड–२०८२ आगामी भदौ १९ गते शुक्रबार काठमाडौंस्थित नेपाल प्रहरी क्लब, भृकुटीमण्डपमा भव्य रूपमा आयोजना हुने भएको छ।
आयोजक ब्राण्डरुट इन्टरटेन्मेन्ट प्रालिले कार्यक्रमको तयारी तीव्र पारिएको जनाएको छ। संस्थाका अध्यक्ष सुनिल बस्नेतका अनुसार ‘कलाको मान, स्रष्टाको सम्मान’ भन्ने नारासहित आयोजना हुन लागेको अवार्ड समारोहमा नेपाली गीत–संगीत क्षेत्रका विभिन्न विधामा सक्रिय कलाकार, सर्जक, संगीतकार, गीतकार, गायक–गायिका, मोडल तथा संगीतकर्मीहरूको योगदानको कदर गरिनेछ।
आयोजकका अनुसार नेपाली संगीत क्षेत्रमा नयाँ पुस्ताका कलाकार तथा सर्जकहरूको उल्लेखनीय सहभागिता बढिरहेका बेला उनीहरूको सिर्जना र योगदानलाई प्रोत्साहन गर्नु कार्यक्रमको प्रमुख उद्देश्य हो। अवार्डले कलाकारलाई थप सिर्जनात्मक कार्य गर्न प्रेरित गर्नुका साथै नेपाली मौलिक गीत–संगीतको संरक्षण, प्रवर्द्धन र विकासमा टेवा पुग्ने अपेक्षा गरिएको छ।
चौथो संस्करणसम्म आइपुग्दा नेसनल ब्राण्ड म्युजिक अवार्ड नेपाली संगीत क्षेत्रका विविध प्रतिभालाई एउटै मञ्चमा जोड्ने महत्वपूर्ण अभियानका रूपमा स्थापित हुँदै गएको आयोजकको दाबी छ। यस वर्ष विभिन्न विधाका उत्कृष्ट प्रतिभाबीच प्रतिस्पर्धा हुने र उत्कृष्ट कलाकार तथा सर्जकलाई अवार्ड तथा सम्मान प्रदान गरिने जनाइएको छ।
अवार्डका विभिन्न विधामा मनोनयनमा परेका कलाकार तथा सर्जकका लागि हाल भोटिङ प्रक्रिया समेत खुला रहेको आयोजकले जनाएको छ। कार्यक्रममा नेपाली कला तथा संगीत क्षेत्रका चर्चित कलाकार, स्रष्टा, सञ्चारकर्मी, संगीतकर्मी, व्यवसायी तथा विभिन्न क्षेत्रका विशिष्ट व्यक्तित्वहरूको सहभागिता रहने अपेक्षा गरिएको छ।
आयोजकका अनुसार अवार्ड समारोहलाई केवल प्रतिस्पर्धात्मक कार्यक्रमका रूपमा मात्र नभई नेपाली कला र संगीत क्षेत्रमा निरन्तर योगदान पुर्याउँदै आएका व्यक्तित्वप्रति सम्मान प्रकट गर्ने अवसरका रूपमा पनि प्रस्तुत गरिनेछ। कार्यक्रममा विभिन्न विधाका उत्कृष्ट कलाकार तथा सर्जकलाई सम्मानित गरिनुका साथै सांगीतिक प्रस्तुति र मनोरञ्जनात्मक कार्यक्रमसमेत समावेश गरिनेछ।
ब्राण्डरुट इन्टरटेन्मेन्ट प्रालिले नेपाली संगीत क्षेत्रमा लामो समयदेखि सक्रिय व्यक्तित्व र नयाँ पुस्ताका प्रतिभालाई समान रूपमा प्रोत्साहन गर्ने उद्देश्यसहित कार्यक्रमलाई व्यवस्थित र आकर्षक बनाउने तयारी गरिरहेको जनाएको छ। कार्यक्रममार्फत नेपाली गीत–संगीतको मौलिकता, सिर्जनशीलता र व्यावसायिकतालाई थप उचाइमा पुर्याउने लक्ष्य राखिएको छ।
भदौ १९ गते नेपाल प्रहरी क्लब, भृकुटीमण्डपमा आयोजना हुने चौथो नेसनल ब्राण्ड म्युजिक अवार्ड–२०८२ ले नेपाली कला, संगीत र सिर्जनाको क्षेत्रमा सक्रिय स्रष्टालाई एउटै मञ्चमा जोड्दै प्रतिभाको सम्मान तथा नेपाली संगीतको प्रवर्द्धनमा नयाँ ऊर्जा थप्ने अपेक्षा गरिएको छ।
आयोजकले नेपाली गीत–संगीतप्रेमी दर्शक तथा शुभचिन्तकहरूको उल्लेखनीय सहभागितासहित कार्यक्रम सफल हुने विश्वास व्यक्त गरेको छ।
