बडिगाड (बागलुङ)
बडिगाड गाउँपालिका–५ ग्वालीचौरस्थित जोगीवगरमा बिहीबार साँझ अविरल वर्षासँगै गएको पहिरोबाट प्रभावित परिवारलाई लायन्स क्लब अफ बागलुङ बडिगाडले राहत सामग्री हस्तान्तरण गरेको छ।
अविरल वर्षापछि घरमाथिबाट खसेको पहिरोका कारण स्थानीय लोकबहादुर थापाको घर पूर्णरूपमा क्षतिग्रस्त भएको थियो। घटनामा मानवीय क्षति नभए पनि घर बस्न अयोग्य बनेपछि थापाको परिवार छिमेकीको घरमा आश्रय लिएर बस्न बाध्य भएको छ।
विपद्पछिको भोलिपल्ट शुक्रबार लायन्स क्लब अफ बागलुङ बडिगाडले पीडित परिवारलाई खाद्यान्न, लत्ताकपडा तथा अन्य अत्यावश्यक सामग्री प्रदान गरेको हो। राहत हस्तान्तरण कार्यक्रममा क्लबका सदस्य लायन कमलप्रसाद खरेल, लिला बलामी, कल्पना खरेल र ढालेन्द्र शेरचनको उपस्थिति रहेको थियो।
क्लबले विपद्को घडीमा प्रभावित परिवारलाई आवश्यक सहयोग गर्दै मानवीय सेवाप्रतिको आफ्नो प्रतिबद्धता पुनः पुष्टि गरेको जनाएको छ। पहिरोका कारण घरबारविहीन बनेको परिवारलाई तत्काल आवश्यक सामग्री उपलब्ध गराइएकाले केही राहत मिल्ने अपेक्षा गरिएको छ।
लगातारको वर्षाका कारण बडिगाडका विभिन्न क्षेत्रमा पहिरो तथा भूक्षयको जोखिम अझै कायम रहेकाले स्थानीयवासीलाई उच्च सतर्कता अपनाउन आग्रह गरिएको छ। जोखिमयुक्त क्षेत्रमा बसोबास गर्ने परिवारहरूले सुरक्षित स्थानमा सर्न तथा सम्भावित विपद्प्रति सचेत रहन स्थानीय सरोकारवालाले अनुरोध गरेका छन्।
विपद्को समयमा स्थानीय संघसंस्था, जनप्रतिनिधि र समुदायबीचको सहकार्य तथा मानवीय सहयोगले प्रभावित परिवारलाई ठूलो राहत पुग्ने भएकाले यस्ता सहयोगात्मक अभियानलाई निरन्तरता दिन आवश्यक रहेको सरोकारवालाहरूले बताएका छन्।
