काठमाडौँ, २८ पुस । सञ्चार तथा सूचना प्रविधिमन्त्री जगदीश खरेलले आगामी फागुन २१ गते हुने प्रतिनिधिसभा निर्वाचनमा परिवर्तनका लागि मतदान गर्न आग्रह गर्नुभएको छ। नेपाल शैक्षिक परामर्श संघ (इक्यान)को २०औँ साधारणसभाको सोमबार उद्घाटन गर्दै मन्त्री खरेलले मुलुकले परिवर्तन खोजिरहेको अवस्थामा नागरिकले परिवर्तनका पक्षमा मतदान गर्नुपर्ने बताउनुभयो।
मन्त्री खरेलले भन्नुभयो, “मुलुकले परिवर्तन खोजेको छ। निर्वाचनबाट जुनसुकै पार्टी भए पनि राम्रो नेतृत्व आउनुपर्छ। दलको दास वा नेताको अ blind भक्त हुनुहुँदैन।”
उहाँले मुलुकको राजनीति परिवार, गुट र सत्तामा पुग्ने गठबन्धनमा केन्द्रित भएकै कारण देशले अपेक्षित प्रगति गर्न नसकेको टिप्पणी गर्नुभयो। उहाँले निर्वाचनमा पदको लोभ मात्र नभई कार्यकालमा राम्रो कर्म पनि गर्नुपर्नेमा जोड दिनुभयो। राजनीतिक दल वा नेताको दबाबमा परेर पदको लोभ गर्नुको सट्टा स्वतन्त्र रूपमा जनताका लागि राम्रो काम गर्नुपर्ने धारणा व्यक्त गर्नुभयो।
त्यसैगरी, उहाँले आफू पत्रकार हुँदा नै इक्यानसँग सहकार्य गरेको स्मरण गर्दै इक्यानले ग्लोबल एजुकेशनमा महत्वपूर्ण भूमिका निर्वाह गरेको बताउनुभयो। मन्त्री खरेलले इक्यान व्यवसायीहरूले देशको अर्थतन्त्रमा केही सुधार ल्याएको उल्लेख गर्दै आगामी दिनमा आफू जुनसुकै पद वा पेसामा रहे पनि इक्यानलाई सहयोग गर्ने प्रतिवद्धता जनाउनुभयो।
उहाँले पदमा कति समय रहने भन्नेभन्दा पनि पदमा रहेर गरेको कामको महत्त्व बढी हुने बताउनुभयो। छोटो समय सरकारमा रहे पनि आफ्नो कर्मलाई प्रभावकारी बनाउन ध्यान दिएको उहाँको भनाइ थियो।
कार्यक्रममा इक्यानका अध्यक्ष शेषराज भट्टराईले गुणस्तरीय शिक्षाको माध्यमबाट दक्ष जनशक्ति उत्पादनमा संस्थाले महत्वपूर्ण भूमिका खेल्दै आएको जानकारी दिनुभयो।
