काठमाडौं, भदौ २० — नेपाल कम्युनिष्ट पार्टी (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले खेलकुद क्षेत्रको समग्र विकासका लागि माओवादी केन्द्र र अखिल नेपाल खेलकुद महासंघको आक्रामक हस्तक्षेप अपरिहार्य रहेको बताएका छन्।
अखिल नेपाल खेलकुद महासंघको चौथो राष्ट्रिय सम्मेलनको उद्घाटन समारोहमा बोल्दै अध्यक्ष प्रचण्डले पार्टीको सक्रियता बिना खेल क्षेत्रमा क्रान्तिकारी रूपान्तरण सम्भव नहुने स्पष्ट पारे। उनले विगतमा माओवादी नेतृत्वमा खेलकुद मन्त्रालय हुँदा गुणात्मक सुधार भएको उदाहरण प्रस्तुत गर्दै वर्तमान सरकारलाई खेलकुदप्रति उदासीन भएको आरोप लगाए।
“राज्यले ध्यान दिने हो भने नेपाली युवाले विश्व रेकर्ड बनाउन सक्छन्,” प्रचण्डले भने। उनले खेल क्षेत्रमा लगानी, जीवनको ग्यारेन्टी र पेशागत वातावरण तयार गरिएमा राष्ट्रिय अर्थतन्त्रमा उल्लेखनीय योगदान दिन सक्ने धारणा व्यक्त गरे।
क्रिकेट रंगशालाको निर्माणलाई राष्ट्रिय गौरवको आयोजनाका रूपमा अघि बढाउने निर्णय माओवादी नेतृत्वको सरकारबाट भएको स्मरण गर्दै, उनले महासंघलाई जनताको खेल र रूपान्तरणको अभियानको रूपमा अघि बढाएकोमा खुसी व्यक्त गरे।
अन्त्यमा, प्रचण्डले सबै पक्षलाई एकताबद्ध भएर खेल क्षेत्रको समृद्धिका लागि अघि बढ्न आग्रह गर्दै महासंघलाई उत्कृष्ट खेलाडीहरूको संगठनका रूपमा स्थापित भएकोमा बधाई दिए।
