विराटनगर, १२ भदौ २०८२ — नेकपा (माओवादी केन्द्र) अध्यक्ष पुष्पकमल दाहाल ‘प्रचण्ड’ले भारतसँग कालापानी–लिपुलेक सीमा विवादबारे सिधा संवाद गर्ने पहिलो प्रधानमन्त्री आफू भएको दाबी गर्नुभएको छ। विराटनगरमा आयोजित १ नं. प्रदेश समिति सचिवालय बैठकमा बोल्दै उहाँले भारत भ्रमणका क्रममा प्रधानमन्त्री मोदीसँग औपचारिक रूपमा सीमा समस्याबारे गम्भीर संवाद भएको र समाधानको सार्वजनिक घोषणा गराएको बताउनुभयो।
उहाँले पार्टी कार्यकर्तालाई जनतालाई यस्ता उपलब्धिहरू जानकारी गराउन आग्रह गर्दै, आत्मसमिक्षा र आलोचनाको संस्कारलाई पार्टी विकासको आधार मान्नुपर्ने धारणा राख्नुभयो। वैचारिक अराजकता र अनुशासनहीनता संगठनका लागि चुनौती भएको उल्लेख गर्दै, समाजवादको तयारीका लागि गहिरो बहस र संघर्ष आवश्यक रहेको बताउनुभयो।
प्रचण्डले १ नं. प्रदेशलाई “अग्रगामी चेतनाको स्रोत” भन्दै यहाँका कार्यकर्ताको आलोचनात्मक चेतनालाई सकारात्मक संकेतको रूपमा व्याख्या गर्नुभयो। पार्टी विभाजनपछि फर्किएका नेताकार्यकर्तालाई सम्मानपूर्वक स्वागत गर्न निर्देशन दिँदै, होच्याउने व्यवहार नगर्न आग्रह गर्नुभयो।
बैठकमा संगठन निर्माण, वैचारिक बहस र समसामयिक राजनीतिक विषयमा गहन छलफल भएको छ।
