काठमाडौं, भदौ ११ — नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले पार्टीप्रति जनताको विश्वास पुनः बढ्दो क्रममा रहेको बताएका छन्। कर्णाली प्रदेशको पूर्ण बैठकमा भर्चुअल माध्यमबाट सम्बोधन गर्दै अध्यक्ष प्रचण्डले पछिल्ला विभिन्न निर्वाचनहरूमा कांग्रेस र एमाले मिल्दा पनि माओवादी केन्द्र निकट उम्मेदवारहरूको विजयले जनविश्वास पुनः प्राप्त हुँदै गएको स्पष्ट भएको उल्लेख गरे।
उनीले स्थानीय तह, स्ववियु, पत्रकार महासंघ तथा हालै सम्पन्न नेपाल पर्वतारोहण संघको निर्वाचनमा माओवादी केन्द्र निकट उम्मेदवारहरूको विजयलाई जनविश्वासको प्रतीकको रूपमा व्याख्या गर्दै भने, “हाम्रो पार्टी र संगठनप्रति जनताको आशा र भरोसा बढ्दो छ। कांग्रेस र एमाले एकातिर रहे पनि माओवादी केन्द्र एक्लै भएर धेरै स्थानमा विजयी भएको छ।”
अध्यक्ष प्रचण्डले माओवादी केन्द्रको बढ्दो लोकप्रियताले प्रतिक्रियावादी तथा दलालहरूलाई आतंकित बनाएको दाबी गरे। पार्टीभित्र द्वन्द्व सिर्जना गर्न विभिन्न षड्यन्त्रहरू भइरहेको जनाउँदै उनले गुटबन्दी, अराजकता र अनुशासनहीनताको अन्त्य गर्दै पार्टीलाई सुदृढ र एकताबद्ध बनाउने स्थायी समितिको स्पष्ट संकल्प रहेको जानकारी दिए।
शिक्षा विधेयक लगायत विभिन्न राष्ट्रिय मुद्दामा माओवादी केन्द्रले लिएको अडानले जनस्तरमा सकारात्मक सन्देश पुगेको उल्लेख गर्दै उनले विशेषतः शिक्षक समुदायमा समर्थन बढेको बताए। “कांग्रेस र एमालेको गलत सोचको विरुद्धमा हामीले लिएको अडानका कारण लाखौँ शिक्षकहरूले समर्थन जनाएका छन्,” उनले भने।
प्रचण्डले वाईसीएल, विद्यार्थी संगठन लगायत जनवर्गीय संगठनहरूलाई श्रम र उत्पादनसँग जोड्ने प्रयास सफल भइरहेको दाबी गर्दै संगठन विस्तारलाई अझ तीव्र बनाउनु पर्नेमा जोड दिए। “अब घर–घरमा पुग्ने, टोल–टोलमा संगठन निर्माण गर्ने कार्यलाई तीव्र बनाउनु पर्छ,” उनले निर्देशन दिए।
अन्त्यमा, अध्यक्ष प्रचण्डले कर्णाली प्रदेशका नेता तथा कार्यकर्ताहरूलाई पार्टी एकता र संगठन विस्तारमा अग्रसर भई राष्ट्रिय राजनीति परिवर्तनमा भूमिका खेल्न आग्रह गर्दै बैठकको सफलताको शुभकामना दिए।
