ताप्लेजुङ — ताप्लेजुङको फुङलिङ नगरपालिका–१० स्थित काफ्लेपाटी सडकखण्डमा बोलेरो जीपमा विद्युत् प्रवाह भएर भएको आगलागीमा चार जनाको ज्यान गएको छ भने दुई जना घाइते भएका छन्।
पाथीभरा दर्शनका लागि जाँदै गरेको मे १ ज ३०११ नम्बरको बोलेरो जीपमा अचानक विद्युत्को तार खस्दा जीपमा करेन्ट लागेर आगलागी भएको हो। गाडीमा कुल ६ जना सवार थिए।
मृतकहरूको परिचय:
दुर्गा भट्टराई – चालक, फुङलिङ नगरपालिका–१०
आध्या आचार्य (१६ वर्ष) – ललितपुर जिल्ला
सरिता पौडेल (६९ वर्ष) – झापा जिल्ला
विनोद पौडेल (७० वर्ष) – झापा जिल्ला
घाइतेहरू:
सबिना आचार्य (४५ वर्ष) – ललितपुर जिल्ला
अभियम आचार्य – सबिनाका छोरा
प्राप्त जानकारीअनुसार, मृतक आध्या आचार्य घाइते सबिना आचार्यकी छोरी हुन्। साथै, मृतक सरिता र विनोद पौडेल सबिना आचार्यका बाबुआमा रहेको जनाइएको छ। घाइतेहरूको स्थानीय अस्पतालमा उपचार भइरहेको छ।
घटनाबारे थप अनुसन्धान भइरहेको ताप्लेजुङ प्रहरीले जनाएको छ।
