🎬 ‘जनै हराएको बाहुन’ अब ‘जनै हराएको मान्छे’

हिडन खबर डट्कम

भदौ ६ मा रिलिज हुने फिल्मको पोस्टर सार्वजनिक

काठमाडौं – आगामी भदौ ६ गते रिलिज हुने नेपाली चलचित्र ‘जनै हराएको बाहुन : सम्बन्धका धागाहरू’ को नाम परिवर्तन गरिएको छ। अब यो चलचित्र ‘जनै हराएको मान्छे : सम्बन्धका धागाहरू’ शीर्षकमा सार्वजनिक हुनेछ।

निर्माण पक्षका अनुसार हिन्दु धर्मसँग सम्बन्धित केही व्यक्ति तथा संस्थाले नामप्रति चासो देखाएपछि विवाद टार्न शीर्षक परिवर्तन गरिएको हो।

साथै, मुख्य पात्र विजय बरालको पोस्टर पनि सार्वजनिक गरिएको छ। पोस्टरमा उनी रातो सर्टमा दुई झोला बोकेर घर छोड्दै गरेका छन्, आमाले टीका लगाइदिएको दृश्य देखिन्छ। पोस्टरले गाउँबाट सहरतर्फको संघर्ष झल्काउँछ। विजयलाई निर्माण पक्षले ‘एपिक नेचुरल स्टार’को रूपमा प्रस्तुत गरेको छ।

निर्देशन हिमाल न्यौपानेले गरेका छन् भने असोसिएट निर्देशक ‘प्रेमगीत ३’ का अभिनेता मनिष राउत रहेका छन्। चलचित्रमा विजयसँगै केकी अधिकारी, मिरुना मगर, गौरव पहाडी, सुशांक मैनाली, भोलाराज सापकोटा, भावना खपांगी मगर, रियर राईलगायत कलाकारको अभिनय छ।

छायांकन स्थलहरू काठमाडौं, ललितपुर, भक्तपुर र काभ्रेमा सम्पन्न गरिएको चलचित्र हाल पोस्टप्रोडक्सन चरणमा छ।

पटकथा, संवाद भानुभक्त ढकालले लेखेका छन् भने निर्माताहरू कमल न्यौपाने र विमल न्यौपाने हुन्। गोविन्द शाहीको काफिया फिल्म्सले वितरणको जिम्मा लिएको यो चलचित्र विजय बरालको ‘पूर्णबहादुरको सारंगी’ पछि मुख्य भूमिकामा आउन लागेको नयाँ प्रस्तुति हो।