बागलुङ । शिक्षण पेसासँगै कृषि कर्मलाई पनि निरन्तरता दिएका जैमिनी नगरपालिका–१, कुश्मीसेरा डाँडाघरका विद्याधर आचार्य व्यावसायिक फलफूल खेतीबाट राम्रो आम्दानी गर्न सफल भएका छन्।
सुन्तलाचौर माध्यमिक विद्यालय, दमेकका प्रधानाध्यापक आचार्यले विद्यालयको जिम्मेवारीसँगै फुर्सदको समय खेतबारीमा बिताउँदै आएका छन्।
शिक्षण पेसाको व्यस्तताबीच पनि कृषि कर्मलाई प्राथमिकता दिएका उनले केरा र अमिलो जातका फलफूल खेतीबाट वार्षिक लाखौँ रुपैयाँ आम्दानी गर्दै आएका छन्।
परम्परागत खेतीसँगै व्यावसायिक कृषि उत्पादनमा जोड दिएका आचार्यले केरा र अमिलो जातका फलफूलका अतिरिक्त रैथाने बाली कोदो खेतीलाई समेत निरन्तरता दिएका छन्। विद्यालय बिदा तथा फुर्सदको समयमा खेतबारीमै खटिने उनले कृषिलाई आत्मनिर्भरता र आर्थिक समृद्धिको आधारका रूपमा लिएका छन्।
कृषि व्यवसाय विस्तार गर्ने उद्देश्यले आचार्यले यस वर्ष करिब दुई रोपनी जग्गामा नयाँ केराका बिरुवा रोपेका छन्। फलफूल खेतीलाई विविधीकरण गर्ने योजनाअनुसार लिची र आँपका बिरुवासमेत लगाएका छन्। आगामी दिनमा उत्पादन बढाउँदै कृषि व्यवसायलाई थप विस्तार गर्ने उनको लक्ष्य छ।
पछिल्लो समय रोजगारीको खोजीमा युवाहरू विदेशिने क्रम बढिरहेका बेला आफ्नै गाउँठाउँमा मेहनत र लगनशीलताबाट कृषि व्यवसाय गर्न सकिन्छ भन्ने उदाहरण आचार्यले प्रस्तुत गरेका छन्। पूर्णकालीन रूपमा कृषिमा आबद्ध नभए पनि समय व्यवस्थापन गरेर उत्पादनमूलक काम गर्न सकिने उनको प्रयासले देखाएको छ।
कृषिलाई व्यावसायिक र आम्दानीमूलक बनाउन मेहनतसँगै प्राविधिक ज्ञान, उन्नत बिरुवा, सिँचाइ र बजार व्यवस्थापन आवश्यक हुन्छ। स्थानीय सरकारले पनि व्यावसायिक खेतीमा संलग्न किसानलाई आवश्यक प्राविधिक तथा अन्य सहयोग उपलब्ध गराउन सके यस्ता कृषि उद्यमले थप प्रोत्साहन पाउनेछन्।
विद्यार्थीलाई शिक्षाको उज्यालो बाँड्दै आएका प्रधानाध्यापक आचार्यले आफ्नै खेतबारीमा पसिना बगाएर उत्पादन र आत्मनिर्भरताको बाटोसमेत रोजेका छन्। उनको कृषि यात्राले इच्छाशक्ति, परिश्रम र समयको उचित व्यवस्थापन गर्न सके जुनसुकै पेसासँगै कृषि व्यवसायलाई पनि अगाडि बढाउन सकिन्छ भन्ने सन्देश दिएको छ।
