काठमाडौं, साउन २
वातावरण संरक्षण, हरियाली प्रवर्द्धन तथा भावी पुस्ताका लागि स्वच्छ र स्वस्थ वातावरण निर्माण गर्ने उद्देश्यले लायन्स इन्टरनेशनल डिस्ट्रिक्ट ३२५ के (नेपाल) अन्तर्गत बागमती एरियाले शनिबार काठमाडौंको तारकेश्वरस्थित लायन्स पार्क, भ्यू टावरमा बृहत् वृक्षरोपण तथा गोडमेल कार्यक्रम आयोजना गरेको छ।
“Leading with Purpose” भन्ने मूल नारासहित सञ्चालन गरिएको अभियानमा काठमाडौं उपत्यकाभित्रका दर्जनौं लायन्स क्लबका पदाधिकारी, सदस्य, समाजसेवी तथा वातावरणप्रेमीहरूको उल्लेखनीय सहभागिता रहेको थियो। कार्यक्रमअन्तर्गत विभिन्न प्रजातिका बिरुवा रोप्नुका साथै पूर्वरोपित बिरुवाको संरक्षण, गोडमेल र सरसफाइ कार्यसमेत गरिएको थियो।
लायन्स इन्टरनेशनलले विगतदेखि नै वातावरण संरक्षणलाई आफ्नो प्राथमिक सेवामध्ये एकका रूपमा अघि बढाउँदै आएको छ। सोही अभियानलाई थप प्रभावकारी बनाउने उद्देश्यले सञ्चालन गरिएको वृक्षरोपण कार्यक्रमले जलवायु परिवर्तनका चुनौती न्यूनीकरण, जैविक विविधताको संरक्षण तथा हरित क्षेत्र विस्तारमा महत्वपूर्ण योगदान पुर्याउने विश्वास गरिएको छ।
कार्यक्रममा सहभागी वक्ताहरूले वृक्षरोपण मात्र गरेर दायित्व पूरा नहुने भन्दै रोपिएका बिरुवाको संरक्षण र नियमित हेरचाहमा सबैको समान जिम्मेवारी रहने बताए। उनीहरूले वातावरणीय सन्तुलन कायम राख्न, प्राकृतिक विपद्का जोखिम कम गर्न तथा स्वच्छ हावा र स्वस्थ जीवनशैलीका लागि वृक्षरोपण अपरिहार्य रहेको धारणा व्यक्त गरे।
लायन्सकर्मीहरूले सामाजिक सेवासँगै वातावरणीय उत्तरदायित्वलाई समेत जोड्दै वृक्षरोपण अभियानलाई निरन्तरता दिने प्रतिबद्धता जनाएका छन्। पछिल्ला वर्षहरूमा बढ्दो वन विनाश, प्रदूषण र जलवायु परिवर्तनका असरलाई मध्यनजर गर्दै यस्ता अभियानले समुदायमा सकारात्मक सन्देश प्रवाह गर्ने विश्वास गरिएको छ।
आयोजकका अनुसार यो कार्यक्रम केवल एकदिने वृक्षरोपणमा सीमित नभई रोपिएका बिरुवाको संरक्षण, नियमित गोडमेल तथा हरित क्षेत्र विस्तार गर्ने दीर्घकालीन योजनाको हिस्सा हो। यसले समुदायमा वातावरणप्रतिको सचेतना अभिवृद्धि गर्नुका साथै सामाजिक उत्तरदायित्व निर्वाहमा नागरिक सहभागिता बढाउन मद्दत पुग्ने अपेक्षा गरिएको छ।
हरियाली संरक्षण, स्वच्छ वातावरण र दिगो विकासको लक्ष्य हासिल गर्न सामूहिक प्रयास आवश्यक रहेको सन्देश दिँदै कार्यक्रम सम्पन्न भएको थियो।
