नेपाली कम्युनिष्ट पार्टीले आगामी प्रतिनिधि सभा निर्वाचन–२०८२ का लागि आफ्नो अपिल सार्वजनिक गरेको छ। पार्टीले राष्ट्रिय स्वाधीनता, लोकतन्त्रको सुदृढीकरण, सुशासन, भ्रष्टाचार नियन्त्रण, आर्थिक–सामाजिक रूपान्तरण र वैज्ञानिक समाजवाद निर्माणलाई प्रमुख एजेन्डा बनाएको छ।
प्रमुख प्रतिबद्धताहरू
– राष्ट्रिय स्वाधीनता र सार्वभौमसत्ता रक्षा: बाह्य हस्तक्षेपविरुद्ध दृढतापूर्वक उभिने घोषणा।
– लोकतान्त्रिक प्रणालीको स्थिरता: संघीयता, समानुपातिक सहभागिता र बहुदलीय प्रतिस्पर्धात्मक लोकतन्त्रलाई सुदृढ गर्ने अठोट।
– संविधानको संरक्षण र परिमार्जन: संविधान जनताले प्राप्त गरेका अधिकारहरूको दस्तावेज भएको र आवश्यक परिमार्जन संविधानले निर्देश गरेअनुसार मात्र हुने स्पष्टिकरण।
– निर्वाचन प्रणाली सुधार: खर्चिलो र अस्थिरता ल्याउने वर्तमान प्रणालीलाई सरल र कम खर्चिलो बनाउन प्रतिबद्धता।
– सुशासन र पारदर्शिता: भ्रष्टाचारमा शून्य सहनशीलता, सम्पत्ति छानबिन आयोग गठन, र जनताको घरदैलोमै सेवा पुर्याउने योजना।
– सामाजिक न्याय: जातीय, लैङ्गिक, धार्मिक तथा सांस्कृतिक विभेद अन्त्य गर्ने र कुरीति–अन्धविश्वास विरुद्ध प्रभावकारी कदम चाल्ने प्रतिज्ञा।
– आर्थिक रूपान्तरण: कृषि, उद्योग, ऊर्जा, पर्यटनमा उत्पादन वृद्धि, रोजगारी सिर्जना, व्यापार घाटा कम गर्ने र स्वाधीन अर्थतन्त्र निर्माण गर्ने योजना।
– परराष्ट्र नीति: पञ्चशीलका सिद्धान्तमा आधारित समानता, अहस्तक्षेप र पारस्परिक लाभमा जोड। असमान सन्धि–सम्झौता खारेज गर्ने र अतिक्रमित भूमि फिर्ता गर्ने प्रतिबद्धता।
– वैज्ञानिक समाजवादको लक्ष्य: शिक्षा, स्वास्थ्य, रोजगारी, सामाजिक न्याय र सामूहिक स्वामित्वमा आधारित समाज निर्माण गर्ने दीर्घकालीन लक्ष्य।
दस्तावेजमा भनिएको छ: “जसरी व्यवस्था बदल्यौँ, त्यसैगरी अवस्था पनि बदल्नेछौँ। यो हाम्रो दृढ प्रतिज्ञा हो।”
यसरी पार्टीले आफ्नो अपिलमार्फत मतदातालाई तारा चुनाव चिन्हमा मतदान गर्न आग्रह गरेको छ।
